闽南语文章阅读：生日

生日！生翼！酵生日着说生日快乐？因为咱侬随位老母的腹肚出来就哭？因为按呢所以则着卜较欢喜咧则说着快乐？阿兄伫咧的时阵定定笑我是一尾蝒虫，我觅笑说家已是一只鬼仔。二斤几出世的老母生我八斤半，顶头的阿兄阿姊一个一个减半斤起去。我生阿婴也是八斤半。会理解老母带身的时阵迄老猪母皮腹肚着偌食力。

诚紧，佫两月外日，就三年啰。

顶礼拜拍电话度倒去迄厝顾孙的玉花，问伊有看电视无，有看讲古无。伊说有啊！伊说伊逐日看。毋久伊袂认得迄个讲古的查某侬就是妹仔啰！伊说汝诚乖哦！伊说顶日有拍电话度阿姊，毋久声说听了无成阿姊，路尾伊偂毋敢佫拍，说惊歹势。我说有啥通歹势啊。位阮厝蹛成十年若家已序大侬尔啰。我知伊是歹势，惊阮会嫌伊，说惊伊卜来揣阮麻烦。诚实是一个好老姆。老母过身了后伊倒去迄厝，骹骨还袂啥行。路尾一摆仔位电视里看着我，欢喜仔拍电话来度我，我则顺喙问伊骹骨疼较好无。伊说好啰。伊说伊路尾来残联做手术，踮二十外工，了五六万箍，骹头趺的碗碎去，规块换捒……我说汝酵毋度阮知啊？囝新妇有骂汝乎？伊笑笑无说啥。

旧年开正，姊妹仔相说卜去永春看伊。路尾无闲通去。顶日阿兄对年，共阿姊说今年拢着揣一日来去看伊啰啊！看迄粒伫老母巴脊正中央，细汉的时阵我规日摸的迄粒红红软软的贵人痣。

这篇有关于闽南语文章阅读：生日的文章，就为您介绍到这里，希望它对您有帮助。